بالليل

بالليل بس ما لاقيك ت إحكي معك وتحكي معي

بحسّ إنّو هالقصّة مش حقيقيّة،

وإنك مش موجود

وإني وحدي

بجرّب فكّر بالمنطق

وقول عندك شغل، تعبان

عندك ارتباطات ومواعيد وسفر

بس عاطفتي بهالوقت من الليل بترجع تغلب

وبقول ما بيهمّني كلّ هالشي

ما بدّي إلاّ إنّك تكون موجود

وبكتب

مرّات ببعتلك شو بكتب

ومرّات بكتب وما بتردّ

وبقول يمكن ما وصلت الرسالة

ومرّات بقول عم تقرا وتزعل

وما بدّك تخبّرني إنّك زعلان

حتّى ما إزعل أكتر

بس بكلّ الحالات بيمرق الوقت بطيء

وما بيطلع ع بالي إشتغل شي

وبتصير الكتابة إلك وسيلة

حتى بكرا بس إرجع شوف شو أنا كتبت

بصدّق القصّة

وبقول عن جدّ إنت موجود

وعم إكتبلك