مجنون فيكي

 

وجّك إلي

ت إرسمو

لوحات عشق ملوّنه

عيونك ألف مرة

يكرموا

جبينك عِلي

فوق القهر

من حنان الشمس

ومن عبير الزهر

مين بيحرمو؟

***

جسمِك إلي

ت حررو

عنك لباس العيب

هالمرة سقط

جسمك إلي

ت أغمرو

بالغنج

ت كرّمو

مش ت إقهرو

ولا اجرحو

بلمسه غلط

***

إسمك إلي

ت يصير

اسمي معلق بإسمك

متل اللي جنّوا كتير

وما عاد بدن يعقلوا

ولا ياكلوا ولا يشربوا

مجنون فيكي

والناس مش رح يعتبوا

لما ع إسمك

حروف إسمي بيسألوا

بيجوز يا فيروز؟

 

بيجوز يا فيروز

 

من زمان كتير

وقت كنت زغير

كان عندي وطن

قدّ المحبّة كان

غنّتو فيروز

 

وطن مليان رفاق

نام مرّة وفاق

ع صوت الرصاص

تقاتلوا الرفاق

وجمعتن فيروز

 

غربّتني الحرب

وبيعدتني الدرب

ما كان بعلمي

إنّو الوطن كلمة

غنّتا فيروز

 

بيجوز يا فيروز

صوتك يساع بلاد

ويزيّن الأعياد

وملايكة السما

يحسدو فيروز

 

يا صوتها خدني

ازرعني بهاك الأرض

تلّي الدني غناني

للحلا، للحب

ت تليق بفيروز

مشتاقة ليكن بيروت (تحيّة لضحايا تفجير مرفأ بيروت)

 

إنتو يا قمح لبنان

يا مونة الخير

يا بيدر ومليان

السنة اللي كانت ناطرة

خلف البواب

نادرة ترجع

ت نبكي سوا

ع سنين إسما غياب

راس السنة عنّا

صار مطلع آب

وكلّ سنة بآب

رح ننر تطلّوا

تقعدوا معنا 

وما نقبل تفلّوا

مشتاقة ليكن البيوت

مشتاقة ليكن بيروت

***

ما تنسوا في ولاد

لازم يرجعوا

ع غيابن زغرت تيابن

مين بدّو يلبسا

نعست عيونن

مين قادر يحرسا

اشتاقوا لحضن إمّن

ولو كان حضنا

بركة دموع ودم

والهمّ قال لاجريها اركعوا

اشتاقوا لكتف بيّن

ولو كان كتف البيّ

من صليب الحزن

صاير يوجعوا

هودي زغار

من الليل بيخافوا

الليل اللي جاب الويل

بعدو من هداك اليوم

يشرب دمع

ويلحوس شفافو

ويقول مين بدّو بعد

يرحل معي ويموت

مشتاقة ليكن البيوت 

مشتاقة ليكن بيروت

***

رح نلتقي عند العصر

هونيك ع  المينا

مطرح ما دمّ وقهر

بكينا مش عليكن بس

ع حالنا بكينا

مطرح ما صارت صوركن

زينة الساحات

مطرح ما صار الردم

عنوان للطرقات

مطرح ما السنابل عليت

ومن خجلها حزنت، تكيت

مطرح ما الحجارة بكيت

ع الناس اللي بلحظة صاروا

بلا حيطان تقدر تحمين

من نار كان بدا تمحين

وتترك وراها سكوت

مشتاقة ليكن البيوت

مشتاقة ليكن بيروت

شو بدّي بعينيي

 

حتّى لو غرقوا عينيّي

بالعتمة بعرف رح فيي

إقشع وجّك بإيديي

يا لأغلى من حالي عليّي

 

من خطواتك بعرف إنّي

رح إركض صوبك تغمرني

بتلاقيني وبتحملني

بحبّ وشوق وحنيّه

يا لأغلى من حالي عليي

 

ريحة عطرك بتنوّرني

بتبيعد هالظلمة عنّي

بتخلّيني إرقص، غنّي

وشوف إني أحلى صبيّة

يا لأغلى من حالي عليي

 

لمّا بتحكيني ع العالي

بيتشيطن فيي خيالي

بتهمسلي بيطلع ع بالي

حبّك شو بدي بعينيي

يا الأغلى من حالي عليي

شو ناطرة ما بتشلحي

 

شو ناطرة ما بتشلحي

عنك تياب الحزن

ت نرقص سوا

نحنا تعبنا

والتعب ما لو دوا

غير الغنا والرقص

متل شجره بَيْن

ديّات الهوا

يلا اشلحي

تياب الحزن

ت نرقص سوا

***

شيلي عن عيونك

منديل البكي

ويلا اضحكي

دبلت جفونك

وع التم نعسان الحكي

خلي شفافي

تلملم الدمعات

والحكيات

ع صدري اتكي

ويجنّ بالقلب الهوى

ونرقص سوا

***

ضاع ناس كتير

ع دروب الدني

شي فل ع بكير

شي ختير من الهم

وجبينو حني

نحنا بقينا

يمكن ت نحكي

حكايتن

وبعد ما حكينا

الحكي ما عاد

في منو نوى

قومي اشلحي

تياب الحزن

ت نرقص سوا

#ماري_القصّيفي

#تفجير_مرفأ_بيروت

#٤آب

 

الياس خوري بقدّاس ضحايا مرفأ بيروت

 

حابب كتير الياس

يقوم من موتو

ويروح ع القداس

يسند وجع إمّو

ويشرب بدالا الكاس

خاف ت تلمحو وتنهار

من قبل ما تضمو

صار رح يبكي

واختنق صوتو

سرّب على الصورة

رسم بسمة حب

وحطّا على تمو

هالتم يللي

ما لحق ينباس

الا بلهفة قلب

اسمو قلب إمو

والإم شو إسما؟

ما حدا بيعرف

منعرف بإنّا بس

إم الياس

#ماري_القصّيفي

#جريمة_٤_آب

#تفجير_مرفأ_بيروت

#٤آب

#الياس_خوري

 

العدّ العكسيّ (1 من 3)

الثورة بلبنان مش ممكن تنجح بشكل عام وشامل لأنو بالآخر كل حدا عم يرجع لقطيعو، حتّى العلمانيين صاروا قطيع وكأنن طايفة جديدة نازلة لبيط بغيرها، كرمال هيك لازم تكون الثورة موزّعة بشكل أفقيّ وعامودي، يعني ثورات ضمن الطائفة الوحدة مثلًا، وثورات من الطبقة الفقيرة ضد الطبقة الغنية من سياسيين ورجال دين ومصرفيين وموظّفين، لأني صرت شبه مقتنعة (عدا عن استثناءات قليلة) إنو كلّ حدا عندو بيت فخم (مش بس قصر وفيلا) لازم ينسأل من إين لك هذا؟
بتظبط الثورة لمّا الشبّ بيسأل بيّو: بابا إنت موظّف بالدولة ومعاشك معروف، كيف عنّا فيلّا أربع طوابق وخدم وحشم وسيّارات ومدارس وجامعات راقية؟
بتظبط الثورة لمّا العسكري يسأل الضابط المسؤول عنّو: سِيْدنا! راتبك معروف كيف معها مرتك تشتري كلّ هالتياب والمجوهرات والسكربينات من أفخم المحلّات وبتعطيني كم قطعة قديمة من عندها لمرتي؟
بتظبط الثورة لمّا الملتزم بدينو بيسأل رئيس طايفتو: ليش إنت معك تاكل وتشرب وأنا ما معي؟
بتظبط الثورة لمّا ما منعود نشوف ع صفحات التواصل الاجتماعي صور البيوت الفخمة بمسابحها النضيفة والطاولات العامرة بالأكل، ولا نشوف المطاعم والشاليهات بالمصايف عاجقة بالناس يللي معن دولارات
بتظبط الثورة لمّا ما بيعود في بكعب كلّ بناية محلّ مانيكور وبيديكور ونتف شعر، وبيرجع في مكتبة لبيع الصحف والكتب والمجلّات،
بتظبط الثورة لمّا ما بيعود كعب إجريكن ع رمل الشطّ اللبنانيّ أنعم من لسانكن إنتو وعم تحكوا عن لبنان
بتظبط الثورة لمّا بتقرّروا شو هيي لغة بلدكن، ومين عدو بلدكن، ومين الخاين ومين الشهيد،
بتظبط الثورة لما بترجع الزراعة حاجة أساسيّة مش موضة، لأنو الزراعة بدها صبر وطولة بال وعناية وانتظار وارتباط وما فيها بخشيش، والموضة بتتغيّر كل شهرين تلاتة،
بتظبط الثورة لمّا يللي نازل يثور مش عم يحلم يصير زعيم أو نايب أو وزير، ولكن عم يشتغل ع السكت ت يوصّل الشخص المناسب للمطرح المناسب، لأنّو مش ضروري الثائر الناجح يكون قائد ناجح أو وزير ناجح...
بتظبط الثورة لما هيدا الثائر ما بيقتل كلب شارد، ولا بس يعصّب من حدا بيقلّو إنت معاق، ولمّا ما يعجبو حكي بنت بيشتمها بشرفها وشرف إمّها
بتظبط الثورة لمّا بيتلاقى رجّال بيرجّع ولادو ع حضن إمّن وما بيعاقبها بحرمانها منن لأنّها تركتو
بتظبط الثورة لمّا ما منعود نتمسخر ع يللي بيحكوا فرنسي غلط أو إنكليزي غلط (هيدا موضوع تاني رح إحكي عنو بعدين)، أو ع يللي بيستعملوا كيس النايلون تبع الخبز كيس زباله ت يوفّر ع البيئة وع جيبتو
بتظبط الثورة لمّا منعرف إنّو التضامن مع جورج فلويد ما رح يحلّ أزمة العالم ولا رح يخلّينا نصير شعب حضاري وراقي، لأنو من زمان فتاة النابالم كمان هزّت ضمير العالم (1972)، والطفل الصومالي يللي قاعد النسر ناطر موته ليلتهمو (1993)، وصورة استشهاد محمد الدرة (2000)، وصور التعذيب في سجن أبو غريب (2004)، وصورة نادية الإيزيدية يللي أغتصبها إرهابيّو داعش (2014) وصورة إيلان كردي يللي وجدوا جثته ع الشط لتركي(2015)، وصور الحروب كلها بما فيها مجلّدات الحرب اللبنانيّة يللي فيها ملايين الصور المرعبة عن المجازر، كلّ هودي الصور هزّوا ضمائر العالم كم يوم وبعدين نسيوا الناس هالصور وكمّلوا حياتن،... إلّا نحنا، مصرّين نضل متمسّكين بحكايات الثأر والموت ت نسجّل أعلى رقم بكتاب غينيس بعدد الضحايا والشهدا وما منقبل إلّا ننبش مدافن الماضي وأكترنا ما بيعرف غير عناوين عن يللي صار، بدءًا بمجزرة رهبان مار مارون (517) مرورًا بمجزرة كربلاء (680)، وصولًا إلى مجازر المماليك في شمال لبنان (1283)، ومجازر الجبل (1860) بين المسيحيين والدروز، وغيرها وغيرها من المجازر يللي صارت بعد 1975 وبتخلّينا نفكّر مليون مرّة قبل ما نكتب تاريخ لبنان (غير الحضاري والفنيّ) يللي كلّو دم وحقد.
كرمال هيك وقبل ما نعمل ثورة عامة شاملة، يمكن لازم نعمل ثورة ع حالنا، ع أفكارنا البالية، ع رأينا بالطايفة التانية، ع برامج التمسخر ع التلفزيونات، ع نشرات الأخبار وبرامج السياسة، ع الأحزاب يللي منتمي إلها ت نغيّرها من جوّا، ع شوفة حالنا وشعاراتنا الغبيّة (شعب بيحبّ الحياة، المرأة اللبنانيّة سيّدة الأناقة...) ع كنائسنا وجوامعنا وخلواتنا، ع تقديس الشعرا والكتّاب، ع نظامنا التربويّ الفاشل، ع مدارسنا الخاصة يللي انهارت عند أول أزمة وبعدين منبقى نحلم بالثورة
#ماري_القصّيفي
#في_انتظار_الثورة

رن رن يا جرس... خلص بلا ضجّة

جرس قديم من مخلّفات إحدى المدارس المقفلة
التي كانت تابعة لمطرانيّة بيروت

رح إكتب باللبنانيّ بلكي في حدا لغتو أجنبيّة وما بيفهم عربي وخصوصًا العربي الفصيح:

ما بعرف مين هوّي العبقريّ الذكيّ يللي عم يوزّع أفكارو المستوردة بالمدارس الكاثوليكيّة تحديدًا، وآخر اقتراحاتو منع دقّ الجرس لأنّو صوت الجرس بوتّر الأعصاب، بيعمل فوضى، وواحد من أسباب التلوّث السمعيّ.

فيا حضرة العبقريّ/ة: الجرس مرتبط إرتباط قوي، بلبنان تحديدًا، بالمدرسة يللي كانت تنشأ جنب الكنائس أو ضمن حرمها. ومتل ما كان الجرس الكبير بالكنيسة يدعي الناس للصلا، كان الجرس الزغير بإيد الكاهن أو الراهبة أو المعلّم يدعي الولاد للدرس أو الرجعة ع البيت. كرمال هيك شكل الجرس الزغير متل شكل الجرس الكبير.

بمرحلة لاحقة ومتل ما صار بالجرس الكبير يللي ما عاد في رجال تقدر تدقّو، ويللي تحوّل ع الكهربا، صارت الجراس بالمدرسة ع الكهربا...

وإذا اليوم المدرسة الكاثوليكيّة بدها تعتبر دقّ الجرس بيعمل عقد نفسيّة فهالشي بيعني إنّو نحنا كلّنا معقّدين، وأوّلنا أصحاب هالأفكار المعقّدة

وإذا المدارس بتعتبر صوت الجرس سبب فوضى فلازم نشوف الفوضى يللي عم تنشأ من غياب الجرس والاتّكال ع الساعات بالتلفونات والإيد، والتأخير بالصفوف وتضارب الساعات وتناحر المعلّمات وضحك التلاميذ

وإذا المدارس بتعتبر صوت الجرس مصدر تلوّث سمعي فيعني لازم جراس الكنايس كلّها تسكت إيّام الآحاد والأعياد حتّى ما حدا علمانيّ أو غير متديّن أو من غير طائفة أو مُربّي شغل برّا ينزعج سمعو

وإذا المدارس بتعتبر صوت الجرس بوتّر الأعصاب لأنّو مرتبط بالدرس فيقطع الدرس وساعتو، لأنّو إذا الدرس بوتّر الأعصاب فما بيكون الحلّ الإبداعيّ إنّو نحطّ موسيقى كلاسيكيّة بدل الجرس، لأنّو هالشي بيعني إنّو ما تكرهوا يا ولاد الجرس ولكن اكرهوا الموسيقى...

كلّ عمرو الجرس يدقّ، وطلع في أجيال بتعرف تقرا وتكتب وتحكي عربي ولغات وتنجح... وإذا كانت المعالجات التربويّة واقفة ع الجرس فيا عين يا ليل ع الحلول التربويّة يللي ما خلّت مشكلة عالقة لدرجة صرنا زهقانين من عدم وجود مشكلات بالمدارس...

وإذا في فوضى  فمش الحقّ ع الجرس ولكن ع الفريق التربويّ والتعليميّ والإداريّ وع تربية الأهل

وإذا في عقد نفسيّة فيمكن لأنّو نسبة الطلاق كبيرة والعائلات مفكّكة والمعالجات فاشلة

وإذا في تلوّث سمعي فالأكيد إنّو الجرس آخر شي بيتحمّل المسؤوليّة بوجود الصريخ بالبيت والصفّ والطريق والموسيقى والتلفزيون 

وبكرا بس يجي حدا يقول الصليب بيعمل توتّر نفسيّ للولاد لأنّو فيه عنف ما تقعدوا تنقّوا وتبكوا وتنوحوا ع التعرّض للرموز الدينيّة وعن الاضطهاد يللي عم يتعرّضولوا المسيحيين

وعمرو ما يرنّ جرس زغير وبلا ما يدق جرس كبير... إذا هيك بتنحلّ المشكلات التربويّة
بالحقيقة كلّ هيدا ما بيهمّني بس اعملوا معروف واجهوا المشاكل الحقيقيّة بالتربية وما تتخبّوا ورا جرس.

التشرذم اللبنانيّ بلغّة الوجع

Schizophrenia

Ester Guory

بس ننوجع منحكي باللغة يللي منحكي فيا بأحلامنا وصلاتنا ومنصرخ فيا وجعنا. وما بعتقد بعزّ دين الحرب اللبنانيّة كان في وجع قدّ هالمرحلة برغم كلّ قسوة الحرب وبرغم كلّ المحاولات اليوم لإشاعة الأمل وتوزيع سناريوهات الخلاص من الأزمة، كرمال هيك عم بكتب باللبناني عن الوجع اللبنانيّ...

نحنا اليوم كتير مشرذمين ومقسومين ومقسّمين ومش طايقين بعضنا. وما بقا نضحك ع حالنا وع غيرنا. والانقسامات يللي بيناتنا اليوم بتمسّ الحضارة والهويّة واللغة والعادات والأكل والشرب والموسيقى والفنون كلّا. هالحكي ما بيعني إنّو في حدا أحسن من حدا، ولكن صار في حدا مختلف عن حدا، يمكن سابقو، يمكن متخلّف عنّو، ولكن ع الأكيد مش حدّو.

مرّة كتبت إنّو بغاء الطائفيّين سببو غباء العلمانيّين، وبعدني مقتنعة إنّو الخلاص يللي كان مرتبط بدولة علمانيّة عم يبعد يوم بعد يوم، والكيان الصهيونيّ يللي اعتبرناه وبعدنا منعتبرو مغتصب وحقود وعنصريّ صرنا متلو، عم نغتصب مناطق وشوارع وتلفزيونات وعقول، وعم نحقد ع بعض ومنرفض الآخر يللي ما بيشبهنا، ومنختلف ع صفات الله وتحديد الشهدا ونوع اللبس والشرب...

يعني الله ما عاد هوّي زاتو بين المسلمين أنفسن، ولا بينن وبين المسيحيين، والعدرا يللي وارد ذكرا بالقرآن ما عرفت الألم ولا مات إبنا ع الصليب، والشهيد إذا كان بس هوّي يللي بيموت كرمال الله (أيّا الله؟؟؟) ما بيظبط نعملّو ذكرى ب 6 أيّار، وهالشي بيعني إنّو ما في شهدا بالحرب الأولى، ولا في شهدا صحافة، ولا في شهدا جنود بالجيش، وإذا مطلوب المسيحيّ يحترم حجاب المسلمة (يللي في خلاف حولو بين المسلمين أنفسن) ومش مسموح للمسلم يحترم خيار المسيحيّة إنّو تلبس شورت (والعكس صحيح)، وإذا الخمر بالعقيدة المسيحيّة عنصر من عناصر الذبيحة الإلهيّة هوّي خطيئة عند المسلمين، وإذا فيروز ما بينحطّوا أغانيها ع المنار لأنّو الموسيقى ضدّ الدين، هالشي بيعني إنّو كلّ تاريخنا الحضاريّ مليان خطايا، يعني شوشو ونصري شمس الدين وتوفيق الباشا وشعرا الزجل وصولا إلى أم كلثوم وعبد الحليم وعبد الوهاب وكل يللي اشتغلوا بالسينما اللبنانيّة والمصريّة والسورية، وبالمسرح، وبكلّ أنواع الفنون، هنّي بجهنّم اليوم، وهالشي عم يخلّي جهنم تصير كتير حلوة.

لمّا تعيّنتْ وزيرة محجّبة، كتار انتقدوا وقالوا هيدي مش صورة لبنان، ويللي دافعوا قالوا احكموا ع شغلها مش ع حجابها. وهالشي صحيح. ولكن كمان بيعني إنّو ما نحكم ع شكل بنت من لباسها المتحرّر وننطر ت نشوف شغلا. هيدا مش شرخ وإنقسام؟؟؟

ولمّا غطّت وسائل الإعلام مبارح الأخبار عن شهدا اسطنبول كتار اعتبروا هالشي مبالغة غير مبرّرة، ونسيوا إنّو هيدا الإعلام زاتو غطّى كتير مآتم ومآسي صارت بلبنان لدرجة كنّا كلّنا نقول إنو صار الإعلام وراق نعي. وشو يعني يكون في شي إسمو شهداءنا وشهداؤن؟؟؟

حتّى الأشخاص يللي بيتابعوا كتاباتي بيعبّروا عن هالشرخ الفاضح: وقت يللي بكتب عن أطفال سوريا واليمن وغزّة وليبيا بتكتر طلبات الصداقة من مسلمين أو يساريّين "محسوبين ع المسلمين"، ووقت يللي بكتب متل مبارح عن شهدا اسطنبول بيكتروا طلبات الصداقة من مسيحيّين ما بحياتن سامعين بإسمي أو بيعرفوا شي عنّي. هيدا شو إسمو؟؟؟ وأنا شو بطلع بالآخر، ومع مين، وضدّ مين؟؟

كتار من قرايبيني عم يتزوّجوا مسلمات، ولكن ما بيقبلوا خيّاتن ياخدوا مسلمين، وبس نسأل عن شي وحدة من العروسات، بيكون الجواب: هيي مش من هوديك الإسلام، هيدي مرتّبة ومعلّمة وبتلبس متلنا، ورح تتعمّد كمان. إيه بعز دين الحرب ما كان في لا هيك زيجات مش معروف شو دينها، ولا هيك حكي مش معروف شو جنسو...

صرنا بكلّ شي شعب الـ outlet، وما بدنا حدا يعرف منين منجيب غراضنا، وبس نلتقي بحدا منعرفو منعصّب ومنخجل ومنقول عم نشتري تياب للبنت يللي عنّا (يعني العاملة الأجنبيّة). نفس الشي عم يصير مع أفكارنا المستوردة بالجملة من مخلّفات أسواق العالم، وبعدنا شايفين حالنا إنّو مخترعين الحرف، ومش عارفين إنو صرنا عبيد الحرف، وأعداء الكلمة.

***

كلام حبّيتو:

Yehia Jaber

2 hrs · 

لوكان لبنان كل سكانه مسيحية ولا في نسمة مسلمية فيه راح يتقاتلوا المسيحية ويصلبوا بعضهن ..ولوكان كلوا لبنان مسلم من العاقورة للناقورة ولامسيحي فيه من رميش للكورة كمان راح يتدابحوا الإسلام بالسيف والسيوف .. ولوكان لبنان كلوا شيعي أو سني أو درزي حاف كمان راح ينقسموا على بعضهن ويتعاركوا ببعضه ويقلعوا عيون بعضهن ..إفهموها هيدا الشرق ياحبيبي ..ياغبي .. إن صلبت على المسيح أو صليت على النبي ..ماينطبق على لبنان ينطبق على سورية العراق وباقي الأمة العربية والإسلامية والمسيحية ..المذبحة واحدة

 ***

لبنان فايسبوك وتويتر

إيلي القصيفي | الأربعاء  04/01/2017

مقالات ذات صلة

عن  موت رضوان حمزه الذي يميتني خوفًا