نامي منيح (تهويدة للأطفال)

نامي منيح
نامي منيح
لا تخافي من صوت الريح
صوت الريح سافر لبعيد
رح نحكي أحلى حكاية
عن بكرا لعندِك جايي
بُكرا حامل سحر جديد
أحلامِك ملّيها زهورْ
ألعاب، غناني وعصفورْ
يزقزق ع سطوح القرميد

تغطّي منيح
تغطّي منيح
صلّي وقولي كل شي منيح
صلّي كرمال الإنسان.
دفيانة اللعبة حدّك
لون الأحمر ع خدّك
شو بيشبه زهر الرمّان
لا تقولي مش نعسانة
عيونك صارت دبلانة
الفِرخة نامت والصيصان

تغطّي منيح
ونامي منيح
ديك الحيّ بكّير بيصيح
تيوعّي الشمس من النوم
لِمْ بتصيري صبيّة
وبتغنّي هالغنيّة
لا تنسي شو عملنا اليوم
غنّينا، ركضنا، لعبنا،
رسمنا، زرعنا وتعبنا
خِلص اليوم، يلاّ ع النوم.