 |
| مغارة الميلاد في إيليج - لبنان |
عيد
الميلاد عيد الفرح أكيد، هيك بشّروا الملايكة ولكن أي نوع فرح وأي نوع احتفالات،
بعرف الحكي يللي بدّي قولو ما رح يفيد ولا رح يوصّل لمطرح ولكن تعوّدت إكتب ت فكّر
بصوت عالي وفيكن ما تقروا ولا ينسمّ بدنكن:
1-
إذا منشوف ع صفحات الفيسبوك عدد السيكار وكاسات النبيد وقناني الويسكي ومنحسب كم
متر أرض بتشتري/ كنّا عرفنا ليش في خوف ع الوجود المسيحيّ
2-
إذا منحسب ثمن زينة الميلاد بالبيوت ومنجمع سعر الطابات والتماثيل ومنشتري فين كم
متر أرض/ كان المسيحيّ توسّع وما عاد خاف ع وجودو
3-
إذا منحسب ثمن الأكل والحلويات والهدايا والتياب/ كان طلع معنا رقم خيالي بيشتري
كتير من الأراضي وما بيعود المسيحي بيقدر يقول إنو في خوف ع وجودو بلبنان والشرق
4-
إذا منحسب ثمن التماثيل الضخمة المرفوعة فوق التلال والجبال بهدف جذب
"المؤمنين" وتنشيط السياحة الدينيّة/ كنا عرفنا إنو التوسّع بالعرض
ضمانة أكبر من الارتفاع طلوع... لاحقين نطلع صوب السما
5-
إذا منحسب كلفة الاحتفالات بالمناطق المسيحيّة والرسيتال والديكور والقرى
الميلاديّة/ منعرف إنو بينشرى فيا كتير أراضي معروضة للبيع
6-
إذا منحسب شو بيصرفوا المسافرين يللي جايين يعيّدوا مع أهلن وأكيد مع كتير نقّ
وتكشير ومقارنة مع بلاد برّا، منعرف إنّو كان أريحلنا لو اشتروا أراضي يعملوها ع
قياس طموحن وأحلامن...
الحكي
عن التمسّك بالأرض مش شعار ولا موضة بيخلص وقتا... لاحقين ع المهرجانات والتماثيل
والكنائس الفخمة... لاحقين نعمل زينة ونشرب نبيد وسيكار... خلّونا بالأوّل نضل
بالأرض وبعدين منحتفل... هالحكي مش ضدّ الفرح يللي مرتبط بالميلاد، ومش ضدّ
ينبسطوا الناس... ولكن ما ينقّوا ويبكوا ع وجودن بلبنان ويحطّوا الحقّ ع الكنيسة
والزعما...
صور
الزينة والتياب والحفلات الفاخرة صارت فاجرة بهيك وضع...خصوصا مع النق ع الوضع
الاقتصادي والسياسي والفساد بالدولة... فرجاء حدّدوا الأولويّات وكونوا صادقين مع
نفسكن، لأنّو التضحية كرمال الوطن ما بتكون بالروح والدم، فيا تكون بقيمة سهرة
وثمن معطف فرو وحقّ قنينة عطر...
الشعوب
يللي بدّها تبقى بأرضها بدها تتنازل عن شي عابر وآني ت تربح شي ثابت ودايم...
والأرض هيي الثبات والضمانة وتجارب شعوب الأرض بتعلّمنا هالشي
في
أحزاب وطوايف بلبنان قرّرت إنّو بدها تضل بلبنان وعم تعمل كل شي كرمال هالبقاء،
اشترت أراضي وسلاح وزاد عددها وعم تعلّم ولادها فنون القتال إلى جانب العِلم وتحصيل الشهادات، وفي فئة مسيحيّة عم
تركّز ع الـSavoir Vivre
وتعلّم ولادها كيف بيعملوا حفلة شاي من الطراز الراقي!
القصّة
قصة اختيار... ويللي بيختار ما لازم ينقّ...
هناك تعليق واحد:
منطق سليم الرب يبارك آمين
إرسال تعليق