كأنّو كبرنا (2)

كانت الأعياد مناسبة حلم، صارت وقت للذكرى، ذكريات عن ناس مرقوا بحياتنا وفلّوا، عن ناس حبّيناهن ومرقوا، عن ناس ماتوا وبعدن بالبال ما ماتوا، عن خيبات منحاول نقتنع إنّا هيي يللي عملتنا...

كانت الأعياد ما تساع غيرنا، صارت الأعياد مطارح واسعة بتجنّ فيا ريح الحزن هيي وعم تسأل عن الناس يللي وحدن، عن الناس يللي موجوعين، عن الناس يللي مسافرين، وما عاد العيد غير ليلة طويلة ناطرة يطلع الضو

كانت الأعياد أكل وشرب ورقص بلا تفكير وتحليل وفلسفة، اليوم صارت علامات استفهام كبيرة عن كيف وليش ولأيمتى وشو بعد... كنّا ننطر العيد، صرنا ننطر التنزيلات يللي بعد العيد، كنّا زغار ويللي حولنا كبار، راحوا الكبار وصرنا نحنا كبار، وحدو العيد بعدو زغير ضايع بالعجقة