النشيد الوطنيّ مش مزاج 1 (من ذاكرة الفيسبوك) 8 تمّوز 2019

مهرجانات بعلبكّ - تمّوز 2019

إلى كلّ المدافعين عن مرسيل خليفة، ومع الاعتذار من تلاميذي يللي عرّفتن ع مرسيل خليفة بعزّ الحرب والقصف:

1- شعوب الأرض كلّها بتعرف تميّز بين البلد والوطن، البلاد بتفرط بالواقع والوطن بيضلّ بالوجدان، بينحمل بالقلب والذكريات والأغنيات والتراث

2- كلّ الشعوب بتهرب من أرضا بسبب الحروب وما بتحمل معها غير ألبومات الصور العائليّة ومفاتيح البيوت والنشيد الوطني والعلم

3- النشيد الوطني مش أجمل موسيقى ولا أجمل كلمات، ولكن بيكفي إنّو انعزف بحفلات ومهرجانات ومآتم وأنشدوا تلاميذ المدارس ت يصير حامل تراث وتاريخ وذكريات

4- إذا الشعب اللبناني ما عطي قيمة للغة العربيّة والنشيد والعلم فلشو بدو يعطي قيمة ما دام لا بقا في أرض ولا عرض، يلعن عرض المثقّفين بس يصيروا سئيلين ومفلسفين

5- مرسيل خليفة نفسو لمّا غنّى بمسرح جورج الخامس قبل يحطّوا النشيد الوطني ولكن هوّي بقي واقف خلف البرداية

6- كلّنا عايشين بالزبالة، ومنعرف إنّو ما عنا زعما، وما عنّا حكومة عم تشتغل شغلها، مش وحدو مرسيل خليفة عم يعاني هيدا إذا كان بعدو عم يعاني، ولكن مش كل ساعة منبلّ إيدنا بشغلات مفترض تكون بمنأى عن الأحزاب والسياسة

7- بعلبك بنيوها الرومان بزنود العبيد، فليش قبل يغنّي فيها؟

8- ما بيهمّني النشيد الوطنيّ عن مين مسروق ومن شو مستوحى، ومنقدر نحكي مجلّدات عن تأثّر كبار الموسيقيّين بموسيقى غيرن وبينن عبد الوهاب والأخوين رحباني... وما في شي بيخلق من ماشي... 

9- لو كانوا هالمدافعين عن مرسيل بيشتغلوا بالتربية كانوا بيعرفوا إنّو ما فيك تقول شو ما كان وساعة يللي كان، لأنو هيدا الجيل يللي ما بقا عندو ولا قيمة لشي، مش ناقصو حدا يتفلسف وينظّر بالوطنيّة كأنّو ما حدا وطني غيرو، 

10- التلطّي ورا وطن فيروز والرحابنة وزكي ناصيف ما بيحمي حدا، لأنو عاصي بنفسو كان طرق أكبر حدا بيتطاول ع رمز لبناني كف ما بيفهم

وبالنهاية عن جد قرفت من الفيسبوك ومن كتار حاملين لواء الثورة هنّي وقاعدين بأوروبا وأميركا أو عم يبرموا بين الدول والمهرجانات

السياسيّين شرشحوا البلد، ولكن نحنا الشعب عم نشرشح الوطن، ويللي مش عاجبو مع السلامة
#ماري_القصّيفي
#مرسيل_خليفة
#النشيد_الوطنيّ_مش_مزاج