شربل مش موضة وعنّايا مش مول (تمّوز 2018- من سلسلة الموارنة مرّوا من هنا)

عن شربل البقاعكفري:
لكم ضجيج إحتفالاتكم به وله صمت محبسته...(سمير غصن)
***
يا جماعة "المؤمنين" يللي هجمتوا الليلة ع عنّايا ت تعيّدوا مع شربل، انشالله تكونوا ع السمع وحدا منكن واعي:

زيارة شربل مش موضة ولا واجب، إنّو يعني مش مجبورين تنتعوا حالكن وتقعدوا بالعجقة ع الطريق ساعتين ت توصلوا وتزوروا خمس دقايق وبعدين تنصرفوا للعشا والأركيلة، وعنّايا مش مول يعني مش متل الـ ب  ABCفما فيكن توصلوا تتجوّلوا وتتطلّبوا وتتفلسفوا، وما فيكن تتصرّفوا بمديغوريه بطريقة وبعنّايا بطريقة، يعني هونيك ما في أراكيل ولا مخيّمات ولا غناني وهوّارة ودبكة... صحيح هودي حلوين بس مش هنّي الهدف من زيارتكن. أصلًا ببلاد العالم كلّا بتصيروا متل الشاطرين مجبورين بنمط لباس معيّن بأيّ مكان بتزوروه.

من أكتر من عشرين سنة، زرت عنّايا بمتل هالليلة، بس ما كانت الأركيلة دارجة، وكان في بوسطة جايي من دير الأحمر وفيا ختياريه، نزلوا ونصبوا خيمة ودبكوا وغنّوا بعد ما زاروا وشاركوا بالقدّاس، ومن وقتا افتكرت إنّو الجو بعدو هيك، تاري لأ، تغيّرت إشيا كتيرة، وصارت الزيارة لعند شربل مشوار وتنزيهة وسهرة وغدا أو عشا وأركيلة طبعًا.

بعدين إنت يا خواجه مبسوط بسيقانك وهالشورت يللي لابسو إنت وجايي تحجّ، ويا مدام لشو ناتعة هالكعب وجايي تعربشي ع المحبسة، ونازلة شدّ بالتنّورة، وتدفيش بالناس، إنّو فكرك شربل قاعد ناطرك، يا مدام، هوّي إمّو ما قابلا، رح يقابل حضرتك إنتي ومستعجلة ومعجوقة بالتلفون والجزدان؟

يا جماعة إذا كنتو مآمنين بقداسة شربل ما فيكن تغيّروه ليصير ع قياس العصر تبعكن، أو بتاخدوه بشروطو أو بلا كلّ هالشغلة، صحيح القدّيس بيصير برّات المكان والزمان، ولكن معليش احترمو شيبتو وحكيو وقيمتو، وشويّة لياقة واحترام باللبس والتصرّف، وما حدا أصلا جابركن ع زيارتو، بس مش الحقّ عليكن، الحقّ ع يللي متساهلين معكن ت تتساهلوا معن.

يا جماعة، شربل ابتعد عن الناس وقعد لوحدو ع رواق ت يصلّي، لوين لاحقينو إذا ما بدكن تصلّوا، اطلعوا ع بشرّي احضروا شاكيرا وما تلبسوا وانشاالله تدنقوا، اطلعوا ع بيت الدين احضروا مرتو لساركوزي والبسوا شو ما بدكن، بس معليش فيكن شوي تتضبضبوا بعنّايا وحريصا وسواهما، وياريت أصلًا في أشكال حلوة تستاهل الخطيّة، بشاعة ع الحلّ، ووقاحة وجهل وغبا...

يمكن يللي بدّن يصلّوا ما قصدوا عنّايا الليلة، هودي بيروحوا ع السكت ومن دون ضجّة، متل ما هوّي عاش، وهيك بيصلّوا معو ع رواق. أمّا إذا كنتو مفتكرين إنّو هيدي هيي شروط البقاء المسيحيّ بلبنان، وإنّو هيدا هوّي الانفتاح والنوعيّة بتكونوا كتير غلطانين، لأنّو الشرطيّات ببرمانا مش هنّي خطّ الدفاع الأوّل عن هيدا الوجود...