غيرة (بالعاميّة اللبنانيّة)

المرأة ذات الثوب الأبيض - بيكاسو

 لمّا صبيعَكْ بيفكفكوا الأزرارْ

وإيد تِسْبَق إيدْ

ت توقّعْ الزنّار

بيضلّ عَ الصدر في زرّين

عم يندهوا من شَوقُن العُروة

بَكّل شفافك ع زرّ لَوْنو نارْ

وخلّي التاني ينقهرْ ويغارْ

ويقول ليش اللي متلك

ما إلو تمّين؟

تخيّلْ العُمر يمرق هيك

تْفِكْفُكْ وتبكيلْ ليلْ نهارْ

وزرّين متلْ ولْدين عَمْ يتشيطنوا

ويخزّقوا تيابُن وبتراشقوا بحجارْ

وْبَيْنُنْ إنتْ تتلبّكْ وتحتارْ:

وقت الغنج كيف بيجنّوا

ولمّا إنتْ تقسى

كيف بيحنّوا

ومِينْ قالْ دَخْلَكْ هالدني

ماعادْ فيها اسرارْ؟