أيّها اللبنانيّون!

(من ذاكرة الفيسبوك) 

أيّها اللبنانيّون!
إذا عندكن كتير مرشّحين ع النيابة مش معناها عندكن ديمقراطيّة وحريّة
إذا بتحكوا لغّات مش يعني إنتو من سلالة موليير وشكسبير
إذا بتعجق بمار شربل وحريصا يوم الأحد مش معناها إنّكن قدّيسين (يمكن لو من المطاعم كانت العجقة أقلّ)
إذا بتكتبوا ع الفيسبوك مش معناها كلّكن كتّاب وشعرا
إذا بتسافروا بالعطلة مش يعني إنّتو متحضّرين ومنفتحين ومش عنصريين
إذا بتسمعوا فيروز الصبح مش معناها إنّو مزاجكن رايق وأعصابكن هادية (يمكن هادية ع صوص ونقطة)
إذا بتحطّوا ولادكن بمدارس كبيرة مش معناها إنّو ولادكن رح يصيروا كلّن أطبّا ومهندسين ونوّاب ووزرا
إذا نسوانكن بيلبسوا ع الموضة مش معناها إنّن بيعرفوا يحكوا مع الناس ومتل الناس
إذا رجالكن بيحكوا سياسة مش معناها بيفهموا بالسياسة
إذا عندكن شاشات نضيفة من الغبرا مش معناها إنّو الإعلاميّات والإعلاميّين نضاف
إذا كنتو بلجان الأهل بالمدارس الخاصّة مش معناها إنكن بتفهموا بغير موضوع القسط
إذا كنتو معلّمين ومعلّمات ومعكن شهادات طويلة وعريضة مش معناها إنكن بتفهموا بالتربية
إذا بتحطّوا لايك ع هالبوست مش معناها رح صدّق إنّي أفهم من غيري