جسمي خرايط
متل شي بلاد كلّا حروب
أهلها كلّن غضب
ومقطّعة الدروب
متل شي أرض ملغومة
متل فكرة
مرقت وفلّت
وكان بدا تنكتب
كلمات مفهومة
***
جسمي وطن موجوع
صوتو صريخ ولاد جوعانين
أو متل المخلّع
ناطر حدا
ت يحملو ليسوع
أو متل شي ختيار
قاعد يعدّ سنين
يحكي لحالو
وينطر يرد الصدى
***
جسمي جروح مفتوحة
متل شي عيون
هاجرها الغفا
متل الجنون
بأرض ساكنها الجفا
متل شي بواب
شلّعها الخراب
متل شي كتاب
مفتوح ع صفحة الغيّاب
ليست هناك تعليقات:
إرسال تعليق