مدام زبيبه

يا مدام زبيبه أنا مش ضد تتقدّمي وتصيري ع مستوى راقي، ولكن بحياة يللي خلّفوكي وندموا ما تنسي مين إنتي ومن وين جايي وشو أصلك وفصلك، يعني إذا صار معك سيارة كبيرة مش معناها تنسي دابّة بيّك يللي كل عمرك تحشّيلا وتطعميا... وإذا صاروا شفافك كبار ومنفوخين، مش معناها تنسي وقت يللي كنت تاكلي كلّ كف ولا التاني ويصير وجّك كلّو منفّخ لإنك كنت حمارة بالصفّ، وكان بيّك يقول لأمّك إنك مش نافعة لا بشغل الأرض ولا البيت ولا المدرسة، وانشالله تلاقي مين ياخدك... وإذا صرتي ما فيكي تعيشي بلا كلبتك المهضومة وصرتي تدافعي عن حقوق الحيوانات، مش معناها تنسي إنو كلّ عمرك عايشة فوق زريبة البقرات وكان عندكن دجاج ومعزي وكلب حراسة... وإذا بتضلّي عند الكوافير مش معناها تنسي إنك كلّ عمرك تجدلي بصل وتوم ع السطح... وإذا بدّك كلّ يوم ترتبي ضفيرك ما تنسي إنّو كميّة التراب يللي كانت تحت ضفيرك من لمّ الزيتون بتعبّي سهل البقاع... وإذا صرتي تلبسي من أغلى محلّات مش معناها تنسي إنّو كلّ عمرك تنعجقي بمشّاية النيلون يللي بعدا معلّمة ع مؤخّرتك المليانه، وإذا لقيتي حدا يتزوّجك مع إنك جاهلة ومدّعيه فلأنّو هيدا يللي أخدك أخدك لأنك هبله وبيصاحب عليك كل يوم وحده وإنتي غاشية وماشية...

فيا مدام، البلد زغير، وكلنا منعرف بعضنا، ومنعرف تاريخ بعضنا، فبحياة يللي خلّفوكي وندموا، ما كتير تشوفي حالك علينا، وخلّيكي مركّزة ع العلكه بتمّك وع نربيش الأركيله بإيدك وع البرونزاج، لأنّك شو ما عملتي ما رح تنجحي، لأنّك من الأساس كنت فلّاحة مزيّفة ومش أصيلة ورح تضلّي مزيّفة ومش أصليّة، ولو سكنتي أغلى قصر على أعلى تلّه. يا مدام زبيبه تذكّري إنّو كلّ عمرك مسنوده ع عوده (بعدك فايقة ع هالمتل أو نسيتي؟) والريشة يللي شكّيتيا براسك ما رح تغيّر شي! فاعملي معروف ما تحكي سياسة أو دين وما تعطي رأيك بالمدارس، أو أزمة النفايات (يعني زباله)، وخصوصًا خصوصًا ما تعطي نظريّات بشؤون تربية الولاد لأنّو أصلا ولادك بيخجلوا فيكي ومرّات بيضحكوا عليكي مع رفقاتن حتّى ما يبكوا من القهر والخجل... من حركاتك وحكياتك ولبسك...

فيا مدام، وحياتك أنا لا بغار منك ولا مقهورة من تطوّر وضعك بليلة ما فيا ضو قمر، ولكن صار كتير يللي عم تعمليه، والأضرب يللي عم تحكيه. فاعملي معروف كوني جميلة وبلا جميلة لسانك، يعني اسكتي وأركلي، اسكتي واعلكي، اسكتي واعملي شوبنغ، اسكتي واعملي برونزاج، اسكتي واعملي السبعة ودمّتا، بس بحياة يللي خلّفوكي وندموا ... انضبّي واسكتي!