صوتك بالجبل تفّاح

عَرْبَشْ عَليي الْحِزِنْ وطالِعْ عَ بالي صيرْ حَيْطْ الصّمْتْ

***
خَبّصِتْ بِغيابَكْ عِنَبْ عُمري
تَ يصيرْ نِقْطةْ خَمر عَ تِمَّكْ
وشو عادْ بدّو الْعُمُرْ يا عُمْري
إلّا الصُّبحْ يِهواكْ والْمسا يِضمَّكْ

 ***

صَوْتَكْ بالجبلْ تفّاحْ
وبالسهلْ ليمونْ
ومتلْ شهقةْ فجرْ
دَقّ بالزيتونْ
صوتكْ إلو ريحةْ أرضْ
غَسّلا أيلول
ونغمةْ هوا مارق 
على الوزّالْ
وبس تسكتْ وما تقولْ
بيصيرْ ضِحكةْ ميّْ
رقصةْ فيّْ
رنّةْ حَلَقْ
رشّةْ حَبَقْ
ومتل المسيحْ 
الْقالْ استحي يا ريحْ!
ومرّاتْ صوتكْ بَرْدْ
وشجرهْ براسْ الجِردْ
ومرّات رغبةْ وردْ
ت ينقودو عصفورْ
وضحكةْ طِفلْ خلقانْ
مش فزعانْ
ودمعةْ بنتْ
صارتْ مَرْةْ
رِجّال بتحبّو