شعر بالمحكيّة

خلصت القِصّا

اللوحة لفريد الريّس

أنا مِشْ حِلِمْ ليلةْ صَيْفْ

ولا أنا نْبيدَكْ بليلةْ كَيْفْ

ولا أنا عَ دَرْبْ بيتَكْ ضَيْفْ

************************************************************

يا مطارحنا لا تنسينا

في مسرح مدرسة الحكمة -هاي سكول - عين سعادة

يا مطارحنا لا تنسينا

تأليف ماري القصيفي / تلحين كمال مكرزل

غنّاها تلاميذ

دورة 2000/ 2001

مدرسة الحكمة - برازيليا - بعبدا

1

يا مطارحنا لا تنسينا

لا تقولي بعدنا وتمحينا

نحنا مش غبرة طبشورا

ولا ورقة دفتر تطوينا

نحنا المركب إنتِ المينا

رح ترجع ليك مراسينا

مهما الريح تبيعد فينا

2

باليوم الأوّل شو بكينا

شو خفنا وما قدرنا حكينا

بس الإيّام العشناها

مش ممكن نقدر ننساها

دمعتنا الليلة منهديها

للحكمة وكلّ اللي فيها

بعدا صواتن عم تهدينا

3

نحنا المجد الماضي حمينا

صوب المجد الجايي مشينا

رح نرجع لو مهما بعدنا

هون كبرنا، هون سعدنا

منوعد مهما العمر يطول

كلّ مرّة مننجح منقول:

بالحكمة عشنا وربينا

****************************************

حِلْمْ وكأنّو جنون

1

مرّاتْ مِدري كيفْ

بيطلَعْ ع بالي كونْ

بْقسوةْ قبرْ ضجرانْ

لا بحبّْ

لا بِشتاقْ

لا بِرْحَمْ حدا.

حِلْمْ وكأنّو جنونْ

شو بخافْ يتحقّقْ

وصير الصدى

لأصواتْ فِلْتاني

مِنْ ألفْ مِجْرِمْ

هربوا بِهَوني ليلْ

ت يهجموا ع بيوت غرقانِي

بنوم الهنا

البطّلْ إلو تاني.

2

مرّاتْ مِدري كيفْ

بيطلَعْ ع بالي كونْ

نار ما بتشبَعْ

آكل الشجرا

وهشّلْ العصفورْ

حاصِرْ بيوت الناسْ

وإحرقْ صُوَرْ عِرسُنْ

سَوِّد الحيطانْ

شَعِّلْ سريرْ الطفلْ

دوّبْ اللعبة البتضلّ تتضحّكْ

وصير الهوا اللي بيحمُلْ رمادنْ

ويُصْرُخْ بأعلى صوتْ:

بِكْرَهْ فرحهنْ

بِكْرَهْ عِيادُنْ.

حَكْيُنْ حكاياتْ ملعونِي

والحبّْ عندنْ مسرحْ وشِبّاكْ

والوفا كِلْماتْ مدهونِي

بالفحمْ...بالطبشورْ

تحت الشِتي بتصيرْ مِجويي.

3

مرّاتْ مِدري كيفْ

بيغلي الغضبْ فيي

بيرقُص تحت جِلدي

بيلمَعْ بعينيي

وبيصيرْ بَدّي

خزّقْ وجوهْ الناسْ

بِلحَمْ إيديي

4

الناس!

شو بيعملوا فيكْ الناسْ؟

بيحوّلوا أحلامكْ كوابيسْ

وبيلبسولَكْ كلّ يومْ لباسْ

بيهدوكْ الهديي

بلكي الخجلْ يعميكْ

وبيعملوا جِهدُنْ ت يحضوا فيكْ

وبسْ تلتِفِتْ صوبُنْ

ت تِحْكيُنْ عنّكْ

بيهربوا منّكْ

وبتضلّ تِنْدَهْلُنْ

حتّى القَهْرْ يكويكْ.

5

الناسْ؟

حوّلوا القدّيس لَجَزّارْ

يِقْتُلْ ويِدْبَحْ على الهينِه

وعن اعمالُو خبّروا ولادُنْ

ت صارْ هالمجرمْ

بطلْ قهّارْ

عرشو متلْ شي مْزارْ

تتعلّقْ على بوابو

روسهُنْ زيني.

6

مرّاتْ مِدري كيفْ

بيطلَعْ ع بالي حروبْ

تِعْصُفْ بْكلّ الكونْ

وتهدِّمْ حْجارو

وْلَيْلْ أخوتْ

يِنْزَلْ ع وجّ الضوّ

ويسوّدْ نْهارو

وْطُوفانْ يُغمُرْ

حِقدْ هالأرضْ

حاجي بقا نْعاني

بَلْكي

بتخلَصْ هالدني

وتولَدْ دِني تاني.

******************************************************************

مش مهم الوقت

هكذا هي ماري، تكتب شعرها اللبناني العامي بمثل الروح الشفافة الصادمة، التي تكتب بها المقال والنثر والسياسة والاجتماع، لون واحد مستل من قوسنا القزحي المنحي، تحبّه، لكنها لا تحب تعدد الألوان حينما يتنزّل في القول، في الشعر، في المقال، في الحياة المعيشة اليومية؛

ماري، لا تعرف الرمادي ولا تقيّة الألوان.. من منكم يعرف شاعراً جاداً ويكتب بهذه الشفافية!
****
صحيفة أوان الكويتيّة - المقدّمة للشاعر الكويتيّ نشمي مهنّا (وضّاح)

مش مهمّ الوقت

بيكفي إنّي كنت

كلّ شي لَ إلكْ

مش مهمّ القصّا خِلصتْ

مش مهمّ تبقى ع طول

أنا بعرف هلّق إنّك

حبّيت وما كنت تقول

ما كان بدّك حدا يحبّك

ولا بدّك إنتَ تحبّ

بدّك تهرب، ت ما قلّك:

مش مهمّ الوقت

بيكفي إنّي كنت

كلّ شي لَ إلك

بيكفي إنّك مرّة حكّيت

وإنت اللي بتكره تحكي

بيكفي إنّك يوم بكيت

وعامِل حالك ما بتبكي

يا المِش قادر تحلم إلاّ

إنّك عم بتروح بعيد

ما رح تبقى ت ما تسمع:

مش مهمّ الوقت

بيكفي إنّي كنت

كلّ شي لَ إلك

مهما تبعُد، شو ما تعمل

ما بتقدر تنسى اللي صار

القصّا انكتبت لا تمحيها

خلّيها حكايي ومشوار

يللي بدّك تبعد عنّي

بتعرف إنّك آخد منّي

الكلمي الخايف تحكيها:

مش مهمّ الوقت

بيكفي إنّي كنت

كلّ شي لَ إلك.

*****************

يا ريت يا قلبي

يسعد صباحك

يا البحلم غرقان

وبسمي حنوني

تبوّس شفافك

خدني ع مهلك

تختك الدفيان

بالعطر يغمرني

ومن ليل شعري

تعمل لحافك

***

رح غلّ ب صدرك

على السكّيت

وإتلفلف بإيديك

من دون ما إحكي

يا ريت يا قلبي

ألف يا ريت

أسكن بجلدك

نام بعينيك

ولحظة التشتاق لوجودي

ويطلع ع بالك

تلمس وجودك

وتصير من رغبتك

تدمع وتبكي

بنزل أنا

دمعة عشق

وبكرج على خدودك

ما بخاف منك ضيع

ولا الحزن يبعدني

بعرف

بتبكي

ت تعود تشربني

**************

غفيان بالوردة

شلحت الوجع يا زغير

وغفيت بالوردي

ومن برد المخدّي

صقّع قلب إمّك

المحروق ت يضمّك

وت يسمع الضحكي

الجمدت على تمّك

ويبست الأعياد ع الشمعات

وما عاد بدّها إختك تغنّي

وتختك المغسول بالدمعات

عم يسألك:

شو بيعدك عنّي؟

وع غراضك عربشت الهموم

وسكتت الكلمات بكتابك

يا حسرتي يا زغير شو مظلوم

ما كنت هيكِ عامل حسابك:

ما عاد فيها ستّك تضمّك

ولا عاد بيّك يحمل غيابك.

************

حزنك رماد الغيم

حزنك رماد الغيمْ

الطالع على بالو

ينزل بعبّ الميْ

تيغسّل خيالو

ومن دون ما يحكي

رح يهرب من الضوّ

ويفوت ع حالو

في دمعتين زغار

تخبّوا سوا وراحوا

عم يكبروا بالسرّ

لا ارتحت، لا ارتاحوا

طَير الوجع تخمين

تتصير متلو تطير

أدّملك جناحو

شو بخاف من أيلول

شهر السفر جايي

في طيور بدها تفلّ

وحزنك لوحدو يضلّ

يشهد عالحكايي

إلّي شو لازم أُول

إلّي مـَرَأ أيلول

***********

مش رح يصيروا كبار

Robert Doisneau - 1943

ما عادوا عَمْ يلعبوا

قدّام البواب

تفرفطوا متل ورقة ورد

يبست بهوني كتاب:

الزْغار ماتوا

ومِشْ رح يصيروا كبار.

لبسوا حرام الدفا

وتلفلفوا وراحوا

بالبرد شو بيحلا الغفا

بس هِنْ ما ارتاحوا

عم يندهوا وين الوفا

وباب العمر

كيف ضاع مفتاحو.

الزغار عن جدّ سرّبوا وماتوا

غلّوا بقلب الأرض وتخبّوا

جوّات حالن ع السكت فاتوا

وحزن الدني بعيونهن عبّوا.

عن جَدّ نزلت دموعن

عن جدّ احترقت وجوهن

عن جدّ دابت لعبهن

وبردت شموعن.

مش رح يصيروا كبار

مش رح يتعلّموا

مش رح يعشقوا

ومرّات رح يتألّموا

مش رح يجيبوا ولاد

ولا ينطروا الْعياد.

مش للحرب الولاد

للغنا

للرقص

لَشَوفةْ حال،

للغنج

للشيطنة

لَشغلة بال

انِبعدوا عن البيت

وطوّلوا المشوار،

للعب

والضحكة

وتَ يسألوا

ميّة سؤال،

وت يكبروا

ويختيروا،

مش ت يفلّوا

وبعدن كتير زغار

مش ت يموتوا

وما يصيروا كبار

************

إيّام التعتير

بيكاسّو

1- شغل ونقّ وخوف كبيرْ

والعمر بيمرق مرقهْ 

كلّ مين عندو هموم كتير 

اللقمي منسرقها سرقهْ 

القصّا ما بدّها تفكير 

وحدكْ رح تبكي وتشقى 

لازم تعرف ع بكّير 

إنّو بإيام التعتير 

الواحد وحدو رح يبقى

*****

2- مدري وين هنّي صاروا

ما عاد حدا يدقّ البابْ

ولا جارْ يسأل عن جارو.

البيت الضجراني حجارو

وبرداني بقلبو نارو

مشتاق لصوت الأحباب

عنّن شو صعبه الفرقه.

الهيئة بأيّام التعتير

الواحد وحدو رح يبقى

*****

3- بليالي الشتي والبرد

الوقت بيمرق ع السكّيت

والقاعد وحدو بالبيت

خايف ينسى كلماتو

عم يحكي وحدو ويا ريت

في مين يسمع حكياتو.

قلبو قدّيش بيلقى

وعارف إنّو بالتعتير

الواحد وحدو رح يبقى

*****

4- من مدّي بِعدوا وفلّوا

وصِرنا نشتاق يطلّوا

نحكي ونتخانقْ ونضلّْ

جيرانْ وأهلْ وما نفلّ

حتّى النجمي النعساني

تحت لحاف الليل تغلّْ

يمكن وحدا المِشتلْقا

إنّو بإيّام التعتير

الواحد وحدو رح يبقى

**********

يا ريتك بتفلّ دقيقا

حاجي ساكن بعينيّ

بوجّي وشعري وإيديّي

يا ريتك بتفلّ دقيقا

ت إسترجع لوني فيّي

ت إتذكّر صوت الضحكي

وكلماتي شو كانت تحكي

وهمس الدعسي عالطرقات

بليالي الشتي والبرد

وقت اللي بتفضى الساحات

وبتغفى الزهرة العنيدي

اللي كان بدّا تسهر بعد

***

عم تحتّل عروقي ودمّي

مرّات بشوفك دوايي

ومرّات بتتحوّل سمّي

ما بشوفك إلاّ قدّامي

نايم ع مخدّة أحلامي

يا ريتك بتفلّ دقيقا

بلكي بترجعلي إيّامي

***

قبلك كان عمري ألوان

كلّ يوم بلون وعنوان

ومن وقت اللي قالوا إسمك

بهوني لحظة، بهوني يوم

ابيضّ الليل، وطار النوم

وصرت العنوان الكبير

ب دفتر عمري الزغير

يا ريتك بتفلّ دقيقا

وما حدا يقلّي الحقيقا

وإنسى إنّك ساكن فيّي

بوجّي وشعري وعينيّ

وبرجفة خوف بإيديّي

يا ريتك بتفلّ دقيقا

يا ريتك بتفلّ دقيقا

*********

أصحابك يا طفل زغير

أصحابك يا طفل زغير

عم بيغنّوا من بكّير

واحد بيقول يا ألله

والتاني بيصرخ يلاّ

طلع الضوّ

لازم نطير.

***

الْعصافير غطّوا وطاروا

بين شجرا وشجرا احتاروا

واحد عم بيسأل عنّك

والتاني زعلان منّك

قال إنّك

ما عدت زغير.

***

يا لبَعدَكْ نايم نعسان

قوم شوف ولاد الجيران

واحد بينادي خيّو

والتاني ناطر بيّو:

تأخّرنا

شو بدّو يصير؟

***

ما بينطر الأوتوكار

شو ما عملت وشو ما صار

لا تتغنّج عليّ

وتقلّي بعد شويّي

ع الصفّ

تأخّرت كتير.

****************************

نامي منيح

نامي منيح
لا تخافي من صوت الريح
صوت الريح سافر لبعيد
رح نحكي أحلى حكايي
عن بكرا لعندِك جايي
بُكرا حامل سحر جديد

أحلامِك ملّيها زهورْ
ألعاب، غناني وعصفورْ
يزقزق ع سطوح القرميد
***
تغطّي منيح
تغطّي منيح
صلّي وقولي كل شي منيح
صلّي كرمال الإنسان.
دفيانة اللعبة حدّك
لون الأحمر ع خدّك
شو بيشبه زهر الرمّان
لا تقولي مش نعساني
عيونك صارت دبلاني
الفِرخة نامت والصيصان
***
تغطّي منيح
ونامي منيح
ديك الحيّ بكّير بيصيح
تيوعّي الشمس من النوم
لِمْ بتصيري صبيّي
وبتغنّي هالغنيّي
لا تنسي شو عملنا اليوم
غنّينا، ركضنا، لعبنا،
رسمنا، زرعنا وتعبنا
خِلص اليوم، يلاّ ع النوم.

******************************************

كن هادي

(دعمًا لمؤسّسة كن هادي للتحذير من مخاطر القيادة)

كن هادي وامشي على مهلك

كن هادي بتوصل ما بتهلك

كن هادي ولا تلوّع أهلك

من قلبو هادي بيندهلك

بيصرّخلك وبيحكيك

كن هادي الله يخلّيك

*** 

من حقّك تسهر وتشرب

من حقّك ترقص ت تتعب

من حقّك تتسلّى وتلعب

بس إمّك ليش ت تتعذّب

خيفانة، صوتا يناديك

كن هادي الله يحميك

 ***

كلّ شِبر بندر تربّيت

تِقلَك شمع وزهر وزيت

شو بتنفع كلمة يا ريت

لمّا بتغيب من البيت

وبيضلّو بيّك يبكيك

كن هادي الله يهديك

***************************************

ما تنسوا يا ولاد

ما تنسوا يا ولاد
بعجقة العياد
كيف بيكون العيد
***
منّو ع الشجرة العيد
ولا مخبّا بهديّي
منّو بفستان جديد
ولا بكنزة شتويّي
بالفرح، الحبّ، العيد
بقلوب مضويّي
بعيون عم تلمع
قناديل سهريّي
***
العيد هويّ الناس
يلاّ ت تنحبّ الناس
نمسك إيد الموجوع
نصلّي ت يفلّ الجوع
نحكي الجار الختيار
ونسمع شو عندو خبار
ت يتزيّن كلّ الكون
بْميّة نجمة وميّة لون
***
ما تنسوا يا ولاد
بعجقة العياد
كيف بيكون العيد


***********************************************